Judges 9

Abimelech

1Jerub-Baal’ tapa Abimelech, Shechem-a, a nu sanggampate le a nu bawng’te khempeuh kiangah pai-a, 2“Shechem a khuami khempeuh tungah, ‘Jerub-Baal’ tapa sawm sagihte in no hong uk ding le mi khat bekin hong uk ding no adingin koi hoihzaw ahi hiam?’ ci-in dong un. Keimah in nomau si le sa ka hi hi, thei un,” a ci hi. ^a

3 A sanggamte in Shechem khuamite tungah a gensawn uh ciangin Abimelech zuih ding lamah puk uh a, “Amah i sanggampa ahi hi,” a ci uh hi. 4Amaute in Baal-Berith biakinnpi panin ngun shekel c sawm sagih pia uh a, Abimelech in ama nungzui mi ngoltolte cialna-in a zang hi. 5Ophrah-a, a pa inn ah amah pai-a, Jerub-Baal tapa a sanggam pasal sawm sagihte suangtumpi khat tungah a that hi. Ahi hangin Jerub-Baal’ tapa a nautum pen Jotham bu-in a suakta hi. 6Tua ciangin Shechem le Beth Millo khua mite khempeuh Shechem sunga om singpi gei-ah khuampi-ah Abimelech kumpi suaksak dingin a kikhawm uh hi. ^b

7 Jotham kiangah hih thu a kigen ciangin Gerizim Vum dawn ah kahto in amaute otsan a, “Shechem khuamite aw, Pasian in na thu uh hong ngaih theih nadingin ka thugen na ngai un. 8Ni khat amau kumpipa ding sathau nilh dingin singkungte a kuankhia uh hi. Amaute in olive kung kiangah, ‘Ka kumpi uh hong hi in,’ ci uh hi. ^c

9 “Ahi hangin olive kung in, ‘Mite le pasiante a kipahtawi khawmna ka thaute nusia in singkungte uk ding ka hi hiam?’ ci-in dawng hi.

10 “Tua zomah singkung in theikung kiangah, ‘Hong pai-in ko kumpi hong hi in,’ ci hi.

11 “Ahi hangin theikung in, ‘A hoih a khum ka gah nusia-in, singkungte uk ding ka hi hiam?’ ci hi.

12 Tua ciangin singkungte in lenggui kiangah, ‘Hong pai-in ka kumpi uh hong hi in,’ ci uh hi.

13 “Ahi hangin lenggui in, ‘Mite le pasiante a lung nuamsak khawm ka zu nusia in singkungte uk ding ka hi hiam?’ ci hi. ^d

14 “A nunung penin singkung khempeuh in thangling kung kiangah, ‘Hong pai inla ka kumpi uh hong hi in,’ ci uh hi.

15 “Thangling kungin singkungte kiangah, ‘Na kumpi dingun sathau nong nilh nop takpi uh leh ka liim ah hong bu un; tua ahi kei leh thangling kung pan mei paikhia-in Lebanon taksingte hultum hen!’ ci hi. ^e

16 “Tu-in Abimelech muangtakin pahtawi a kumpi-in na koih uh ciangin Jerub-Baal le a innkuanpihte tungah ama hong sepsaksa tawh kituakin a gamta mah na hi uh hiam, - 17ka pa in a nuntakna khamin note ading hong dosak a, Midian-te khut panin hong hukhia hi; 18(ahi hangin ka pa’ innkuante na lehdo uh a, tuni-in suang khat tungah a tapa sawm sagihte thatin amah note sanggam ahi man hangin a nasemnu’ tapa Abimelech Shechem mite kumpi na suaksak uh a) - 19note in tu ni-in Jerub- Baal le a innkuanpihte tungah muangtakin pahtawi-a gamta na hih nak uh leh Abimelech no lungnopna hi henla, no zong ama aa in tua mah hi uau! 20Ahi hangin a tuaci na hi kei uh leh Abimelech pan meikuang suakkhia-in Shechem le Beth Millo mite hong hultum henla, Shechem le Beth Millo mite panin meikuang suakkhia in Abimelech hultum hen ou!” a ci hi. ^f

21 Tua ciangin Jotham in a sanggampa Abimelech a kihtak manin a suahtak nadingin Beer ah a tai hi.

22 Abimelech in Israel kum thum sung a uk khit ciangin 23Pasian in Abimelech le kheltat-a a lehdo Shechem khua mite kikalah kha gilo a sawl hi. 24Tua in Jerub-Baal’ tapa sawmsagihte tunga a mawhna uh, amaute sisan luansakna phu a lak thei nadingun a sanggampa a thahpih Shechem khua mite le Abimelech tungah Pasian in a hih ahi hi. 25Amah a langbawlna-un Shechem khua mite in mualdawn ah mi buksimin a paite’ na sut dingin mi pangsak uh a, hih thu Abimelech kiangah kiko hi. ^g

26 Tu-in Ebed’ tapa Gaal a sanggamte tawh Shechem ah kikhin uh a, khua sung mite in amah a muang uh hi. 27Amaute lo ah kuanin lenggah lo uh a, cilin amaute pasian biakinn ah pawi a bawl uh hi. A nek a dawn kawmun Abimelech a hamsiat uh hi. 28Tua ciangin Ebed’ tapa Gaal in, “Ama nasem i suah nadingin Abimelech kua hi-a, Shechem kua ahi hiam? Amah Jerub-Baal tapa hi-in a huhpa Zebul hi lel lo hiam? Shechem’ pa Hamor’ na sem un! Bang hangin Abimelech’ nasem suak ding i hi hiam? 29Hih mite kei khut sung hong tung leh maw! Tuateh amah ka suan zo ding hi. Abimelech kiangah, ‘Na galkap buppi samkhia in,’ ka ci ding hi,” a a ci hi. ^h

30 Ebed’ tapa Gaal in tua banga a gen khuapi ukpipa Zebul in a zak ciangin a heh mahmah hi. 31Amah in Abimelech kiangah kamtai sawlsim a, “Ebed’ tapa Gaal le a sanggamte Shechem ah hong pai uh a, nang langah khuapi a sosak uh hi. 32Tua ahi ciangin tu-in nang le na mite hong kuan unla lopaangte ah na buksim un. 33Zingsang nisuah ciangin khuapi sim unla, Gaal le a mite no do dinga hong paikhiat ciangin na hih nop bangbangun hih un,” a ci hi. ⁱ

34 Tua ciangin Abimelech le a galkapte zanin kuankhia uh a, pawl li kisuahin Shechem kiangah panmun a la uh hi. 35Tu-in Abed’ tapa Gaal paikhia-in khuapi kongpi lutna ah a din laitak tektek in Abimelech le a galkapte a buksimna panun a paikhia uh hi. ^j

36 Gaal in amaute a muh ciangin Zebul kiangah, “En sin, mualdawn pan mite hong paisuk!” a ci hi.

Zebul in, “Mualte’ liim mi-a mukhial hi ni cia,” ci-in a dawng hi.

37 Ahi hangin Gaal in, “En dih ve, gam laizang panin mite hong tuaksukin, pawlkhat lah aitawipa’ singkung lam panin hong pai hi,” ci-in a ko kik hi.

38 Tua ciangin Zebul in, “Na pau phat vial a, ‘A nasem i suah na dingin Abimalech kua hiam?’ na cih na thusim lohte hi lo hiam? Kuankhia inla do ve!” a ci hi.

39 Tua ciangin Gaal in Shechem khua mite kuankhiatpih b in Abimelech a do uh hi. 40Abimelech in amah delh-a, kongpi lutna lampi dungah - kidona hanga liam tampi a puk uh hi. 41Arumah ah Abimelech om a, Zebul in Gaal le a sanggamte Shechem panin a nawhkhia hi.

42 A zingciangin Shechem mite lopaangte ah paikhia uh a, hih thu Abimelech kiangah kizasak hi. 43Tua ciangin amah in a mite kuanpihin pawl thumin khena, lopaangah a buksimsak hi. Amah in khuapi sung pan mi a kuankhia a muh ciangin a sim dingin a diangkhia uh hi. 44Abimelech le a pawlte in khuapi lutna kongpi lam a delh henhan uh hi. Tua ciangin adang pawlnihte in lopaanga omte delh huan uh a, a sattuk uh hi. 45Tua ni tawntung Abimelech in mite thatin khuapi a lak mateng khuapi a sim niloh hi. Tua ciangin khuapi susia a khuapi sungah ci a theh hi.

46 Shechem tausanga khua mite in hih thu a zak uh ciangin El-Berith biakinn, kulh muanhuai sungah a lut uh hi. 47Tua lai-a a kikhop lam uh Abimelech in a zak ciangin 48amah le a mite khempeuh Zalmon Vum ah a paito uh hi. Amah in hei khat la a, singhiang pawlkhat sattanin a liangko-in a pua hi. A ompih mite kiangah, “Ka hih na muh bangbangun manlang takin hih un,” ci-in thu a pia hi. 49Tua ciangin mi khempeuh in singhiang khiakin Abimelech a zui uh hi. Amaute in kulh muanhuai sing siatnelh uh a, a sunga om mite a halkhum uh hi. Tua ciangin Shechem tausang sunga om mi khempeuh numei pasal mi tul khat bang zong a si hi. ^k

50 Tua zomah Abimelech Thebez ah pai-in umcih-a, a la hi. 51Ahi zongin a khuapi sungah tausang muanhuai khat oma, a khuapi sunga mi khempeuh -a numei a pasalin - tua lai-ah a tai uh hi. Amau leh amau kikalhnelhin tausang khum dawnah a kah to uh hi. 52Tausang ah Abimelech paito in a va busim gawp hi. Ahi hangin a hal dingin tausang a manawh laitakin, 53numei khat in angawina suang a tungnung pen khiatsuk-a, a lu kha-in a luguh a kitam hi.

54 Amah in a galhiam puapa sam mengmeng a, “Amaute in, ‘Amah numei thahsa hi,” a cih theih lo nadingin na namsau dok inla kei hong that in,” a ci hi. Tua ciangin a nasempa in amah dawtlet-a, a si hi. 55Israel-te in Abimelech sih a muh ciangin inn ah a ciah uh hi. ^l

56 Abimelech in a sanggam pasal sawm sagih that in a pa tungah a gitlohna hangin Pasian in hih bangin a thuk ahi hi. 57Pasian in Shechem mite zong a gitlohna khempeuh uh a thuk hi. Jerub-Baal’ tapa Jotham hamsiatna amau tungah a tu hi.